उन्हाळ्यातली खाद्य भ्रमंती ...

उन्हाळा जाणवायला लागला आहे तसं  निरा , लिंबू सरबत , जीरा- सोडा , ताक, झालच तर थम्बस अप , माठातलं थंड गार पाणी , कैरी पन्हं  असले स्टॉल्स गावात जागो जागी बघायला मिळत आहेत ... पण माझं लक्ष वेधून घेतलं ते नव्याने निघालेल्या "सोडा - शॉप " नी .. ह्या दुकानात ९० प्रकारचे सोडा फ्लेवर्स मिळतात ... मला आवडलेले फ्लेवर्स म्हणजे .. पान फ्लेवर , कोका -कोला फ्लेवर , कॉफी-बीअर ... अजून बरेच फ्लेवर चाखून बघायचे आहेत .. उन्हाळा संपे पर्यंत सगळे ९० फ्लेवर होतील चाखून !
बरेच  दिवसात  "जनसेवा" त गेलो नव्हतो .. आज जाण्याचा योग आला ... जनासेवाची ट्रेड मार्क असलेली ... बाटलीत मिळणारी लस्सी आजकाल मिळत नाही ... पण "जनासेवा" चा झालेला "मेकोवर " पाहून मन प्रसन्न झालं ... बोलता बोलता बरचं खाणे झाले... दडपे पोहे, निखट सांजा ,कांदे पोहे , कांदा-बटाटा रस्सा पुरी , श्रीखंड -पुरी , बटाटे वडा, मॅन्गो लस्सी ..
नव्या युगाशी जनसेवा नी स्वतः ला जमवून घेतलं आहे... स्वच्छता , अस्सल पुणेरी - मराठी पदार्थ  आणि चव हे जनसेवा नी अगदी पूर्वी पासून .. अगदी "जनसेवा दुग्ध मंदिर" असल्या पासून जोपासलं आहे.
नव्या जमान्या शी जुळवून घेत सेल्फ सर्विस ची एक वेगळी पद्धत , क्रोकरी हि "चायनीज टेक अवे " पद्धतीची , बँकेत असते तशी कुपन सिस्टीम , डिस्पोजेबल ग्लास , चमचे इ ... सगळ बघून जुन्या जनसेवे ची आठवण  मला आली ते काही नवल नाही ...  ऑरडर दिल्यावर १५ मिनिटे  थांबवायची प्रथा मात्र सच्च्या पुणेकरा सारखी राखली आहे ...
जनासेवातच एक अतिशय दयनीय असा प्रसंग अनुभवास आला... एक वयस्कर जोडपं आपल्या ४-५ वर्षाच्या   ( एन आर आय ) नातवा ला घेवून बसलेले दिसले . तो नातू म्हणजे एक अतिशय लाडावलेला कार्टा आहे हे जाणवत होतं .... इंग्रजीत ज्याला "अब्नोक्षिएस " म्हणतात तसं होतं ते कार्ट.... सारखं त्या आज्जी-आजोबांना ओरडत होतं आणि चिकन-सॅन्डव्हीच  मागत होतं... बोली वरून म्हातारा म्हातारी अस्सल "एकारांती" वाटत होती ..थोडे लाजल्या सारखे वाटत होते .. "तसलं" काही खात असतील असे वाटत नव्हते .. पण ते कार्ट काही केल्या आज्जी - आजोबांचे ऐकत नव्हते .. काहीही व्हेज खायला तयारच नव्हते ... आजोबां कडे बघून त्यांचा त्यांच्या नातवा बद्दल झालेला भ्रम निरास जाणवत होता !